HomeTelugu cinema

ఎట్టకేలకు జోర్డాన్ నుండి కొచ్చి చేరుకున్న ఆడుజీవితం చిత్ర బృందం
Published By :  Lasya Raghavaraju Image Image
Prithviraj along with Aadujeevitham crew return to India from Jordan
Friday May 22, 2020

క‌రోనా క‌ట్ట‌డి కోసం విధించిన లాక్‌డౌన్ కారణంగా జోర్డాన్‌ దేశంలో చిక్కుకుపోయిన మలయాళ సినీ నటుడు పృథ్వీరాజ్ సుకుమారన్, దర్శకుడు బ్లెస్సీ తో పాటు 58 మంది చిత్ర బృందం ఎట్టకేలకు స్వదేశానికి చేరుకున్నారు.  58 మంది సభ్యులతో కూడిన ‘ఆడుజీవితం’ చిత్ర బృందం శుక్రవారం ఉదయం స్పెష‌ల్ ఎయిర్ ఇండియా ఫ్లైట్ ద్వారా కొచ్చి ఎయిర్‌పోర్టుకు చేరుకుంది.  దీంతో అభిమానులు, కుటుంబ స‌భ్యులు, స‌న్నిహితులు, శ్రేయోభిలాషులు  సంతోషం వ్య‌క్తం చేశారు. 

తన భర్త సురక్షితంగా తిరిగి రావడం పట్ల పృథ్వీరాజ్ భార్య సుప్రియా మీనన్ భావోద్వేగానికి గురయ్యారు. ఇన్‌స్టాగ్రామ్‌లో ఎమోషనల్ పోస్ట్ చేశారు. ‘‘ఇంచుమించుగా మూడు నెలల తర్వాత పృథ్వీరాజ్, ‘ఆడుజీవితం’ చిత్ర బృందం కేరళ చేరుకున్నారు. నిబంధనల ప్రకారం వారంతా క్వారంటైన్‌కు వెళ్తున్నారు. ఇది చాలా సుధీర్ఘమైన, కఠినమైన నిరీక్షణ. వారు తిరిగి రావడానికి సహాయం చేసిన అధికారులు సహా ప్రతి ఒక్కరికీ ధన్యవాదాలు తెలుపుతున్నాను. ఇలాంటి కష్టకాలంలో మాకోసం ప్రార్థించి, మాలో ఆత్మ స్థైర్యాన్ని నింపిన అభిమానులకు, శ్రేయోభిలాషులకు కృతజ్ఞతలు. నాన్న తిరిగి వచ్చినందుకు అల్లీ (అలంకృత మీనన్ పృథ్వీరాజ్) చాలా ఆనందంగా ఉంది. మరో రెండు వారాల్లో ఆయన్ని చూస్తుందని ఆశిస్తున్నాను’’ అని సుప్రియా మీనన్ తన పోస్టులో పేర్కొన్నారు.

‘ఆడుజీవితం’చిత్రం షూటింగ్‌ కోసం పృథ్వీరాజ్‌, దర్శకుడు బ్లెస్సీతోపాటు 58 మంది సభ్యులతో కూడిన చిత్రబృందం మార్చిలో జోర్డాన్‌కి వెళ్లింది. అయితే కరోనా కట్టడిలో భాగంగా జోర్డాన్‌లో మార్చి 16న లాక్‌డౌన్‌ విధించారు. దీంతో చిత్రబృందం ఇండియాకు రాలేని పరిస్థితి ఏర్పడింది. ఈ క్రమంలో తమను ఇండియాకు తీసుకెళ్లాల్సిందిగా చిత్ర దర్శకుడు కేరళ ప్రభుత్వానికి, ఫిల్మ్‌ చాంబర్‌కు విజ్ఞప్తి చేశారు. తాజాగా కేంద్ర ప్రభుత్వం చేపట్టిన రెండో వందే భారత్‌ మిషన్‌లో భాగంగా ప్రత్యేకంగా ఏర్పాటు చేసిన ఎయిర్‌ ఇండియా విమానంలో వీరు ఢిల్లీ మీదుగా కొచ్చి చేరుకున్నారు.